14 hours ago
Swift News
ਕੈਨੇਡਾ ਦੀ ਆਰਥਿਕਤਾ ਅਗਸਤ ਮਹੀਨੇ ਵਿੱਚ ਲਗਾਤਾਰ ਦੂਜੇ ਮਹੀਨੇ ਲਗਭਗ ਰੁਕੀ ਰਹੀ ਅਤੇ ਸਤੰਬਰ ਵਿੱਚ ਵੀ ਗਿਰਾਵਟ ਆਉਣ ਦਾ ਅਨੁਮਾਨ ਹੈ। ਸਟੈਟਸ ਕੈਨੇਡਾ ਮੁਤਾਬਕ ਅਗਸਤ ਵਿੱਚ ਦੇਸ਼ ਦੀ ਅਸਲ ਕੁੱਲ ਘਰੇਲੂ ਪੈਦਾਵਾਰ ਯਾਨੀ ਰੀਅਲ ਜੀ.ਡੀ.ਪੀ. ਵਿੱਚ ਕੋਈ ਖਾਸ ਵਾਧਾ ਜਾਂ ਕਮੀ ਦਰਜ ਨਹੀਂ ਕੀਤੀ ਗਈ। ਅਰਥਸ਼ਾਸਤਰੀਆਂ ਨੇ ਇਸ ਮਹੀਨੇ 0.2 ਫ਼ੀਸਦੀ ਵਾਧੇ ਦੀ ਉਮੀਦ ਕੀਤੀ ਸੀ। ਥੋਕ ਵਪਾਰ ਵਿੱਚ 1.4 ਫ਼ੀਸਦੀ ਦੀ ਗਿਰਾਵਟ ਆਈ, ਜਦਕਿ ਤੇਲ ਅਤੇ ਗੈਸ ਉਤਪਾਦਨ ਵਿੱਚ ਕਮੀ ਅਤੇ ਅਲਬਰਟਾ ਦੀਆਂ ਤੇਲ ਰੇਤ ਵਾਲੀਆਂ ਸਹੂਲਤਾਂ ਵਿੱਚ ਮੁਰੰਮਤ ਦੇ ਕੰਮ ਨੇ ਆਰਥਿਕ ਵਾਧੇ ਨੂੰ ਪ੍ਰਭਾਵਿਤ ਕੀਤਾ। ਓਨਟਾਰੀਓ ਅਤੇ ਨਿਊ ਬ੍ਰਨਜ਼ਵਿਕ ਦੇ ਪਰਮਾਣੂ ਬਿਜਲੀ ਘਰਾਂ ਵਿੱਚ ਰੱਖ-ਰਖਾਅ ਕਾਰਨ ਵੀ ਬਿਜਲੀ ਖੇਤਰ ਦੀ ਕਾਰਗੁਜ਼ਾਰੀ ਘਟੀ। ਹਾਲਾਂਕਿ ਪ੍ਰਚੂਨ ਵਪਾਰ ਵਿੱਚ 1.2 ਫ਼ੀਸਦੀ ਵਾਧਾ ਹੋਇਆ ਅਤੇ ਮੈਨੂਫੈਕਚਰਿੰਗ ਖੇਤਰ ਵਿੱਚ ਵੀ ਸੁਧਾਰ ਦੇਖਿਆ ਗਿਆ। ਸਤੰਬਰ ਲਈ ਸਟੈਟਿਸਟਿਕਸ ਕੈਨੇਡਾ ਦੇ ਮੁੱਢਲੇ ਅਨੁਮਾਨ ਮੁਤਾਬਕ ਜੀ.ਡੀ.ਪੀ. ਵਿੱਚ 0.1 ਫ਼ੀਸਦੀ ਕਮੀ ਆ ਸਕਦੀ ਹੈ।