6 hours ago
Swift News
ਬ੍ਰਿਟਿਸ਼ ਕੋਲੰਬੀਆ ਦੇ ਲਿਟਨ ਪਿੰਡ ਵਿੱਚ ਮੇਅਰ ਦੀ ਚੋਣ ਦੌਰਾਨ ਦੋਵੇਂ ਉਮੀਦਵਾਰਾਂ ਨੂੰ ਬਰਾਬਰ ਵੋਟਾਂ ਮਿਲੀਆਂ ਹਨ। ਮੌਜੂਦਾ ਮੇਅਰ ਡੈਨਿਸ ਓ’ਕੌਨਰ ਅਤੇ ਉਨ੍ਹਾਂ ਨੂੰ ਚੁਣੌਤੀ ਦੇਣ ਵਾਲੀ ਜੈਨੀਫਰ ਥੌਸ, ਦੋਵਾਂ ਨੂੰ 45-45 ਵੋਟਾਂ ਮਿਲੀਆਂ। ਇਹ ਪਿੰਡ 2021 ਵਿੱਚ ਭਿਆਨਕ ਜੰਗਲੀ ਅੱਗ ਕਾਰਨ ਬੁਰੀ ਤਰ੍ਹਾਂ ਤਬਾਹ ਹੋ ਗਿਆ ਸੀ। ਦੋਵਾਂ ਉਮੀਦਵਾਰਾਂ ਵਿਚਾਲੇ ਪਿੰਡ ਦੀ ਮੁੜ ਉਸਾਰੀ ਨੂੰ ਲੈ ਕੇ ਵੱਖੋ-ਵੱਖਰੇ ਵਿਚਾਰ ਹਨ। 2022 ਵਿੱਚ ਕੌਂਸਲਰ ਚੁਣੀ ਗਈ ਜੈਨੀਫਰ ਥੌਸ ਨੇ ਮੁੜ ਉਸਾਰੀ ਦੇ ਕੰਮਕਾਜ ਦੀ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ 50 ਮਿਲੀਅਨ ਡਾਲਰ ਤੋਂ ਵੱਧ ਦੀ ਯੋਜਨਾਬੱਧ ਬੁਨਿਆਦੀ ਢਾਂਚੇ ਦੀ ਉਸਾਰੀ ਪਿੰਡ ਲਈ ਵਿੱਤੀ ਬੋਝ ਬਣ ਸਕਦੀ ਹੈ, ਕਿਉਂਕਿ ਅੱਗ ਤੋਂ ਬਾਅਦ ਘਟੇ ਟੈਕਸ ਮਾਲੀਏ ਨਾਲ ਇਸ ਦੇ ਰੱਖ-ਰਖਾਅ ਦਾ ਖਰਚਾ ਚੁੱਕਣਾ ਮੁਸ਼ਕਲ ਹੋਵੇਗਾ। ਦੂਜੇ ਪਾਸੇ, ਮੌਜੂਦਾ ਮੇਅਰ ਓ’ਕੌਨਰ ਦਾ ਕਹਿਣਾ ਹੈ ਕਿ ਨਕਾਰਾਤਮਕ ਗੱਲਾਂ ’ਤੇ ਧਿਆਨ ਦੇਣ ਨਾਲ ਪਿੰਡ ਮੁੜ ਨਹੀਂ ਵੱਸੇਗਾ। ਉਨ੍ਹਾਂ ਮੁਤਾਬਕ ਨਵੇਂ ਅਤੇ ਪੁਰਾਣੇ ਵਸਨੀਕਾਂ ਨੂੰ ਵਾਪਸ ਲਿਆਉਣ ਲਈ ਬੁਨਿਆਦੀ ਸਹੂਲਤਾਂ ਜ਼ਰੂਰੀ ਹਨ। 17 ਅਕਤੂਬਰ ਨੂੰ ਪਈਆਂ ਵੋਟਾਂ ਦੀ ਹੁਣ ਅਦਾਲਤੀ ਮੁੜ ਗਿਣਤੀ ਹੋਵੇਗੀ। ਜੇਕਰ ਟਾਈ ਬਰਕਰਾਰ ਰਹਿੰਦੀ ਹੈ, ਤਾਂ ਪਿੰਡ ਦੇ ਚੋਣ ਨਿਯਮਾਂ ਮੁਤਾਬਕ ਪਰਚੀ ਕੱਢ ਕੇ ਜੇਤੂ ਦਾ ਫ਼ੈਸਲਾ ਕੀਤਾ ਜਾਵੇਗਾ।